#شباك_النبى
-------___/---------//__
شباك النبى على باب قلبى
وزعت عليه أطياف حبى
وصنعت عشانه بشوق تعبى
توب العشق بخيط ميال
ولقيته بيضحك بحنينه
ف سعادة مازال
شباك النبى ف الكون ضحكة
بتنور ظلمات االسكة
جيبتلوا ريشة بفلوس فكة
ورسمتلوا صورة ف اوراقى
من اصل الالهام وخيال
ولقيتها كبدر ف سمواته
بيطل علينا ويدلى يضحك بدلال
شباك النبى مفتوح علطول
ولا يمكن يبقى ف يوم مقفول
يا نبينا عليا اكيد مسئول
ولا يمكن اشوف منك اهمال
ياشفيعى ف يوم حشرى مابين
الخوف والأهوال
شباك.النبى ستايره حرير
منقوشة بأحجار وعبير
لو شوفت جمال شباكه تغيير
والعين دمعها هيسيل صورة واشكال
والقلب. ساعتها هيتكلم انا ليكى ميال
شباك النبى بيطل علينا
م الفجر لغاية ليالينا
الفرحة مافارقتش عينينا
من يوم مارأينا الأجيال
بتحيى نبينا بأرواحها وصل ومرسال
شباك النبى ليا يجوز
المسه بأيديا يكون محسوس
وأنور من عشقه فانوس
واكتب ف حسنه الأزجال
انا مهما كتبت ف حسنه سطور
مش هقدر اوصف ف جماله من كل مجال
شباك النبى يااللى عارفنى
وبحسنك من بدرى خاطفنى
ومابين ملايين برضوه شايفنى
صنعت بدون اى جدال
توب العشق عشان خاطرك
من دمعى اللى سال
شباك النبى من اصل ريحان
مرسوم بعطور الرحمن
نسمة تطل على الشباك
لابسة ف عز الصقعة الشال
تشهدلوا بأنه اللى بيصنع
للدنيا جمال
شباك النبى ورد وياسمين
وعشقتك جد بكل يقين
وبميل لجمالك شوق وحنين
أحميك بسلاحى واكون فارس
ف ميدان خيال
والبس لك والله ف رجليا
علشان تتمتع خلخال
شباك النبى ياصنايعية
نصحى من النجمة الفجرية
نتعب علشان لقمة هنية
نصبر وننول بعد الأعمال
ونعيش ع الصبر اللى بيصنع
ف القلب أمال
بقلمى/ هانى السيد
من وحى اللحظة
٢٠١٦/١٢/٢٣
ليست هناك تعليقات:
إرسال تعليق