سجال شعراء العامية .. الثالث الذي أقيم على نبض الابداع العربي
بعنوان (( حانتحدى معاكي اليأس))
الشاعر الكبير / محمد عبد الجواد
الشاعر الكبير / حلمي قاسم
الشاعر الكبير / مجدي فرج عامر
معي الشاعر / أيمن خليل
..........................................................................
أيمن خليل
وحا تحدى معاكي اليأس
واعيش أحلامي جواكي
وبين بكرة وبين الأمس
حكاية عشق في هواكي
أنا نغمة في لحن جديد
أنا صرخة في صدر شهيد
أنا الفرحة في ليلة عيد
أنا العين اللي حرساكي
......
محمد محمد عبدالجواد
أنا فارس .... انا حارس
أنا الموروث و أنا الوارث
أنا درويش على بابك
واقف ف طابور بين أحبابك
أنا بكرة و أنا الفكرة
و أنا فى هواكى اعيش دارس ...
....
حلمى قاسم
وحاتحدى معاكى اليأس
و ح اهرب من خُطا همى
تنسينى جراح الأمس
ف وقت ما تصفى وتضمى
....
مجدي فرج عامر
وباتحدي معاكي اليأس
متلفع بإيماني
وتبقي الجزع وأحنا الرأس
ومش حاشكيكي حِرماني
وبتجرع هواني ف كاس
وعمري ماقلت آه ياني......
يا ألماظه ياقطعة ماس
يانغمه ف بحر ألحاني ..
....
أيمن خليل
وحاتحدى في اعدائك
واعالج من الألم دائك
وانور ليلك العاتم
واصفي نهارك الغايم
وقلبي في الهوى عايم
واكون في وسط حراسك
....
محمد محمد عبدالجواد
ف وسط الموجة هاتحدى
و اكون القوة و الشدة
على عهدك أنام و اصحى
و اعد ف حبك العدة ...
....
حلمى قاسم
ووقت ما تبعدى عنى
يخاصمنى الصفا والفرح
تتوه الخطوه اكمنى
مانيش لاقى طبيب للجرح
ما اهو انتى كل شىء ليا
يا شجره بتهدى حنيه
مفيش غيرى يدوق الطرح
....
مجدي فرج عامر
بنتحدي معاكي اليأس
بنخطي لأحلامنا.....
ومهما أنصاب بقول لا بأس
لسه الدنيا ......قدامناااا
حنعزق همنا ب١٠٠ فأس
حتبقي تروسي خلق وناس
حِلفت بأرضي لن تنداس
ندوس أعداءنا بأ... قدامنااا
....
أيمن خليل
وحابعد عنك الأحزان
وازرع رملتك بستان
واجيب الفرح على بابك
معايا كل أحبابك
ولادك احنا وشبابك
يا أرض الصحبة والخلان
....
محمد محمد عبدالجواد
انا هرسملك اﻷفراح
و اكون ف عﻻجك الجراح
و مهما يلوموا فيا الناس
هيشلك ف العيون و الراس
هصليلك و هادعيلك
و أغنى لحن مواويلك
و اكون ف ظﻻمك المصباح ...
....
حلمى قاسم
و ح اتحدى معاكى اليأس
واجيلك رغم احزانى
يا خير بكره وضى الشمس
يا نسمه بتحي وجدانى
دا انا غيرك ماليش محبوب
وميتى ح اتوب ......مدام ساكنه ف شريانى
....
مجدي فرج عامر
هاتحدي معاكي اليأس وأ....ثور
إغرفي أحلامك في .....طبقها
لو حتي هصارع مليون.... ثور
هاكسر رقابيها وأ....طبقها
وإن أرضك صابها ألام ونا......ثور
راح يندم كل إللي وطأهاااااا
....
أيمن خليل
انا وكفاحي حنقدم
صور للدنيا تتعلم
عشان نكتب على أرضك
حنفدي بدمنا عرضك
نعدي الطول معاه عرضك
نخلي عدانا حيسلم
....
محمد محمد عبدالجواد
و بتحدى معاكى الخوف
و اشيل العثرة من ارضك
و اخلى الدنيا ليكى تطوف
و تتملى ف حما عرضك
يا ساكنة القلب ف العالى
يا موالى ف ترحااااااالى
دانا و اهلى نبات أرضك
....
حلمى قاسم
وح اتحــــدى معاكى الآه
واكمل سكتـــــى بيكى
يطيب جرحى والاقى دواه
ب كلمة صدق ف عنيكى
ولمسة ايدك النـــــاعمه
تاخدها ايديا اعـــديكى
....
مجدي فرج عامر
ف عز ليل السهر باعشق انا ...سمارك
نجار انا لمركبك وبادق م........سمارك
صافيه السما والقمر والدنيا بتزهزه
يابهيه فوق النيل بيزيدوا ......سُمارك
....
أيمن خليل
وحاخد حقنا بالتار
وارجع أرضي بالقنطار
وحزرع زرعتي في ملكي
ولا أشحت ولا أشكي
ولا أحزن ولا أبكي
وربك ع العدا جبار
....
محمد محمد عبدالجواد
و هاتحدى و ما اتحداش
و اكون ع ونشك الوناش
و اصارع لجل م تعيشى
سعيدة بزرعتى و عيشى
و عن حبك م بستغناش ..
....
حلمى قاسم
وح اتحدى معاكى الويل
مدام القلب بيحبك
وشاغله العقل طول اليل
وواخد خطوته دربك
ولو نامت عيون الخيل
انا مبنمش من حبك
....
مجدي فرج عامر
ونقاوح وح اتحدى معاكى الويل
ومكتومه الصدور نارها
بتكوينا
لا عاد ينفع لنا التكييف
ولا مراوح
وحتي النيل معدش خلاص
بيروينا
واصناف البشر متقسمه
شرايح
بندعي الرب يرشدنا
ويهدينا
في طبقات فوق... وفقرا
وحظهم طايح
وأمتي العدل ينصفنا
ويغنيناااااااا
....
أيمن خليل
وحاتحدى جبال الخوف
واخلي حزننا محذوف
واقدم دمي يا بلدي
فداكي جروح دما كبدي
وشدي الحيل معاي شدي
وبكرة النور علينا يطوف
....
محمد محمد عبدالجواد
و قلبى دقته فداكى
أنا بتحدى ف عداكى
م انا عاشق ف محرابك
و اصلى نبتة ف ترابك
و إسمى لحن ف غناكى
م انا بتحدى ف عداكى ...
....
حلمى قاسم
وح اتحدى معاكى اليأس
واطير من عتمتى للنور
هلملم كل ما فيا
ح اهد الخوف واعدى السور
وانشف دمعى ف عنيا
واكون ف هواكى وحش جسور
...
مجدي فرج عامر
حلمي لفوق طاير
وجناحي مش مكسور
لفيت أنا وداير ...
هدت أرادتي السور
انا نسر ف العالي
حلمي دهب غالي
وبهيه تحلالي....
ولقلبها راح أزورر
....
أيمن خليل
وبتحدى ظلام الليل
عشان شفنا في عهده الويل
يانور الفجر مستني
يامركب حلمنا حني
انا صابر ومع إني
بغني في حبك المواويل
....
محمد محمد عبدالجواد
يتنحدى معاكى طريق
يولع ف البراءة حريق
و يقفل باب و يفتح باب
يفرف منك اﻷحباب
و يجعل من حياتنا سراب
بايدى هغل منه الريق
و اعليى الهامة ف بﻻدى
و افتحلك ف ألف طريق ...
....
حلمى قاسم
وح اتحــــدى معاكى الليل
واجيب الضى ع ايدى
وصحبة ورد علشانك
دا يوم ما القاكى يوم عيدى
ومواعيدى معاكى وبس
يا نبض بيجرى ف وريدى
...
مجدي فرج عامر
راح أتحدي معاكي اليأس والضلمه
وأكون لك سور يحاوطك من عدوينك
من الحساد .. من الأرهاب من الظَلَمه
وأكون درعك بيحمي الأرض صان دينك
ونصل حروفي كيف السيف مع الكلمه
وحاطبع قبلتي دايما علي جبينك.....
....
أيمن خليل
وحاتحدى صحاري اليأس
وحزرع أرضنا بوردك
حجيب عزمي واشيل الفأس
في قلبي يا أمنا ودك
وحبدر بالهنا فدادين
واطير في الهوا بلاليين
واحلي بوقنا بالتين
وابيض في التاريخ بعاهدك
....
محمد محمد عبدالجواد
بنتحدى بطول السكة و المدة
نضحى ف سبيل مجدك
و ﻻ هتحوشنا يوم شدة
و مهما نضحى ف هواكى
بغنينا فضا سماكى
و ﻻ نفكر ف يوم ردة ...
....
حلمى قاسم
وح اتحدى معاكى الناس
ونمشى ف سكه وحدينا
انا طيب وكلى حماس
ونفسى نعيش لبعضينا
حياتنا صدق مع اخلاص
نخضرها على ايدينا
....
مجدي فرج عامر
بنتحدي معاكي اليأس
ودا ....بَختي
يادنيا ليه ملاكي الشوك
وليه ...بُختي
فديتك بالولاد والاخ
و..........بأختي
ولون الواد بلون الطمي
لون قمحي
حيملا ف يوم صوامع حب
من قمحي
ماهو نبته من الماضي
وبملامحي
وباتمني أبد ما يدوخ
كما دُختي
....
أيمن خليل
وحاتحدى وانول شرفي
ما انا فاض بيا من قرفي
انام واصحى على صرخة
حكاوي المظلومين صارخة
وحدي الغدارين طخة
عشان أمنع أنين نزفي
...
محمد محمد عبدالجواد
و هاتحدى فلول اﻷمس
و انور بكرة ف جبينك
و ﻻ اعرف فيكى معنى اليأس
و أغير لون دواوينك
و أخلى السعد قدامك
و اعيش العمر خدامك
و اكون عاشق محبينك ...
...
حلمى قاسم
وح اتحــــــدى معاكى الكل
ونبعد عن حياه قاسيه
ونبعد ع الحسد والغل
وناس على وعدها ناسيه
قلوبها فى الظلام بتضل
لا اهى بتعشق ولا راسيه
....
مجدي فرج عامر
وباتحدي معاكي اليأس
والتوهه
ولففان الدماغ بيه
و١٠٠ دوخه
وغربان من بلاد أغراب
وبيجوها
وقابضين بالدولار وجيوبها
منفوخه
وبأتحدي إللي داسوا الإيد
وعضوها
. وركبوا موجة نداله بغدر
مصبوغه
....
أيمن خليل
وحاتحدى ليالي الصعب
وأنهي يوم ماليه الرعب
واجيب بكره واحلامه
واشيل حزنه والالامه
ومهما الغدارين قاموا
حوقف نصبهم واللعب
...
محمد محمد عبدالجواد
و اعلم ف هواكى اﻷهل
و اكون استاذ و انا التلميذ
و أقوم على الوعد بالتحفيز
و أخليلك طريقك سهل ...
...
حلمى قاسم
واكون جواكى نبض وريد
وح اتحدى معاكى الكون
لا ح اهجر دنيتك واخون
ولا عنك ف لحظه ح احيد
ولا عنك راح ابعد يوم
عشان وياكى ببقى سعيد
...
مجدي فرج عامر
بنتحدي معاكي اليأس
يابهيه
ولا راح نيجي يوم نشكي
ونتزمر
ما انا فقري وحبك عندي
انا غيه
وقطرك يجي جنب القلب
ويزمر
ومين فكر يعاديكي
ملوش ديه
بنظرة عين يخر صريع
ومتدمر
...
أيمن خليل
اكيد ع العهد انا باقي
ودايسة في الكفاح ساقي
وحقطف حلم حسادنا
ظلمنا حقد أسيادنا
وليل القسوة ليه سادنا
يا صبح المجروحين لاقي
...
محمد محمد عبدالجواد
و بتحدى الهوى و الريح
و لو هبقى فداكى طريح
و عصفورى بدون جناحات
هاروح و ابعتلك النسمات
و لو قالوا ان عشقك مات
هاقول صاحى بشكل صريح ...
...
حلمى قاسم
وح اتحــــدى معاكى الهم
والم الشــــــوق لو اتبعتر
ماليش غيرك لا خال ولا عم
وانا ف بعدك بدوب اكتر
وانا ف بعدك حقيقى بتوه
وفكـــــرى عليا يتشطر
....
مجدي فرج عامر
بهيه حبها ماااالي
كتير شالت اسي عني
ف صورة جندي ع الجبهه
في عيشه ف وسط احبابها
شهيد واجب وبنهني
ورغم الزنقه والضيقه
وخطوات كلها بطيئه
بنرضي ونقبل المقسوم
وتلقي القلب بيغني
...
أيمن خليل
وحاتحدى جبال النار
وحول ليلنا ألف نهار
وحرفع قدرك العالي
وحكتب اسمك الغالي
تعالي يا أمنا تعالي
حزوق أرضنا أنوار
...
محمد محمد عبدالجواد
و لو قالوا انى مجنونها
و عاشق ف الهوى جنونها
راح اشرب ف هواها الكاس
و اشيلها ف العيون و الراس
و هادعى ربنا يصونها ...
....
حلمى قاسم
وح اتحدى معاكى الصعب
يهون صعبى ف احضانك
يا بلسم بيداويلى الجرح
تروح الروح علشانك
كفايه عليا اشوف الفرح
فى كلمة صدق ف لسانك
...
مجدي فرج عامر
وحابنيلك في قلبي طريق
وحاتحدي معاكي الضيق
وحازرع ورده ف الوادي
ما انا في بحرك وقعت غريق
وحبي لوطني حب برىء
رضعته من امي واجدادي
...
أيمن خليل
وع الجبهة حقف جندي
وازود للعدو عندي
واكون فارس في محرابك
احني كفي بترابك
واطير مع كل أسرابك
لأنك عزوتي وسندي
...
محمد محمد عبدالجواد
و بقاااااالنا سنين بتحدى
موش قاعدين بنتندى
بطول الليل و طول اليوم
م يخطر ف عيوننا النوم
عشان منعيشى فيها اللوم
و ﻻ تقاسى ف يوم شدة ..
....
حلمى قاسم
وح اتحدى معاكى حدود
واخطى خطــــوتى يمك
مانا الغايب مسيرى اعود
وامسح دمعتى بكمك
واخضر صحرتك بورود
ف ضمينى يزول همك
...
مجدي فرج عامر
وحاتحدي وليه انياب
حعلي الصوت وراح أنادي
وراح اخبط وادق الباب
وأشحذ همه ف ولادي
وانده حبنا اللي غاب
ومصر دي روحنا وفؤادي
...
أيمن خليل
وحاتحدى ضلال الغدر
واوقف النزيف والهدر
والملم كل آمالي
ولا راح اقول وانا مالي
دة مال الغلبانين مالي
وبكرة أوفي ستين ندر
...
محمد محمد عبدالجواد
و هاتحدى غلول مغلول
يغير ف ثراكى القول
و هامسح إسمه م الدنيا
و اعيش عن ثغرك المسئول
ما بين لحظة و بين تانية
اعليى فنارك النوار
و اخضر ف هواكى كفار
و لو همشى ف قلب النار
عشان فرحك هقول دنيا ..
....
حلمى قاسم
وح اتحدى معاكى الخوف
ونار الهجر والايام
ح اشيل من وشى اى كسوف
واقول ف هواكى احلى كلام
ف بصيلى اعملى معروف
بلاش القسوه فيا حرام
...
مجدي فرج عامر
وحارفع ف السما ساري
وحاتحدي وحاخد تار
ياهازمين المغول وتتار
انا عاشقك انا شاري
حولعها لعدوي شرار
ماهي بيتي انا وداري
...
أيمن خليل
وحاتحدى طغاة الظلم
وابعت مرسالين بالعلم
وحكتب كلمة في رسالة
وأقول عن ظلمنا قوالة
ده حال الغلبانين حالة
لازمنا حقنا بالسلم
...
محمد محمد عبدالجواد
و مهما الحلم راح يبعد
ﻻبد نكون على موعد
مع البسمة مع اﻷفراح
زوال لهموم شفا لجراح
ف أرضك كل شيئ يسعد .
...
حلمى قاسم
وح اتحدى معاكى سنين
ف قلب التهوه عشناها
على حلم الحياة عايشين
بنحلم يوم مانلقاها
بنحلم بالطريق نوصل
وتكمل سكتى معاها
...
مجدي فرج عامر
انا بأقسم بقرآني وإنجيلي
أزود عن بلدي عن أهلي وعن نيلي
ولا افرط في حبة رمل ياغاليه
واذا استشهدت ما تبكي وغنيللي
...
أيمن خليل
وحاتحدى عروش طالت
وحاتحدى قلوع بالت
تعبنا من نفوس حاقدة
وعقدوا حاياتنا ميت عقدة
وخلو مياهنا ليه راكدة
وحالة الشقيانيين مالت
...
محمد محمد عبدالجواد
و ﻻ حملى الناس شالوه
أنا مهما حبيت من وجوه
حبي ليكى يا حبيبة
حب ابيض كله طيبة
حب فاق كل الوجوه
حب من غيره أتوه
حب طفل لحضن أمه
حب إبن إإشتاق ﻻبوه .
...
حلمى قاسم
وح اتحدى معاكى اليأس
وح افرد ف الهوا جناحى
مخفش قسوتك والحبس
ولا دوسك على جراحى
ولا فرحك ف احزانى
وتكشيرتك ف افراحى
...
مجدي فرج عامر
حاتحدي معاكي اليأس
اللي متشرب جواكي و....راكن
تضاريسك هأحميها بال ...مللي
هنوزع فَرحِنا في ج....راكن
إياكي مره تكللي ت........مللي
حاطينك ف قلوبنا ت.....مللي
شجره بتحمينا وبتضللي
وف قلب العين جوه النني
راح تلقي هواكي جوايا ساكن
...
أيمن خليل
وحاتحدى خريف عمرك
و أملى الكون بألف ربيع
واعلي في السما أمرك
ولا حرمي سلاحي وابيع
انا حافظ يصون شرفك
ومن غير ضمتك راح اضيع
وأي خسيس يخون عرضك
حيبقى في النهاية وضيع
...
محمد محمد عبدالجواد
عاشق بﻻدى و حﻻوتها
عمرى ف حياتى م تسيتها
شاعر لهاا مفتون بها
و تشوفنى إبن ضرتها
....
حلمى قاسم
وح اتحـــــدى معاكى اللوم
واصوم وافطر على صورتك
ولو همك كتير بالكــــــــــوم
ح اقـــــوم واقعد على سيرتك
مــــاليش غيرك وانا طيرك
كفــــــــايه عليا انا اخترتك
....
مجدي فرج عامر
وحاص وحاتحدي واهد جبال
لح حالي يوم لو مال
وحارسم جوه بكره آمال
وحابني واعلي بنياني
وحرسم ضحكه ع الشفه
خلاص عمري ماراح اعاني
بإيدنا حنمسك الدفه
واشيل عن بلدي ياما أحمال
ليست هناك تعليقات:
إرسال تعليق