يابنيه لا تسدي البراح
///////////
الصوت بعيد
زي جاي من سرداب عميق
ينده عليك
والليل يفيق من السبات
يابنيه ياست البنات
وين نجمك السافر صعيد
مالريح صلاح
يابنيه ﻻ تسجي البراح
###
وجعك جراح
وشقاكي كان ياهو التمن
سيبي الزمن يضحك يجمل في الجراح
ﻻ ترسمي الخط الوهم
علشان عيون
كل الغلابه الشايله هم
ماتظن شقاها الاستراح
وما تظن انو الدنيا ليها بتبتسم
وتاخد نفس
وتلم باقي من الحكاوي
السارحه ما بين العتامير والرياح
###
الصوت يعود
من تاني ينده
يجدد في الوعود
ويهاتي بيك
رغم الخفوت
كل الفراغ مالي الصدي
والريح تشتت غير هدي
حتي المفازات والدروب
السكه والصي والمدي
والغيمه ما صابا الكساح
الغيمه جات طرحة زفاف
ورزازه عطر بالندي
والزهرة غنت للضفاف
###
الجنيا رغم الوجعه بيك
زادت سماح
يابنيه احكي القول صراح
ياشهقة الحلم العشم
يابت حوارينا البتحلم
ومع شقاها بتنسجم
حلمك مباح
مالطيره يابنيه بتعود
من اخر الدنيا ابعيده
مشتاقه لي حضن الوطن
وحتي لو عصفت رعود
او هبت الريح الشديده
تلقاها راجعه مع الشفق
بي شوقا مع خط الافق
فارده الجناح
###
يابنيه ما كل قيد حديد
وﻻ كل حبل مفتول رسن
ماقيدك الشاطر حسن
اقري العيون
ما اظن عويناتك قسن
ياهو الزمن قيد الحديد
وفارسك شديد
رغم الشدايد والمحن
رغم السنين المرة ما شاقو الكفاح
يابنيه ﻻ تسجي البراح
الريح تودر في الدروب
عش طيره ضاع
مالغربه يابنيه الضياع.
شيمه وهبوب
غيمه وطر
والقول مباح
#####
صلاح احمد علي انامل
ليست هناك تعليقات:
إرسال تعليق