هنلبسك توبك _ بقلم (وائل عمر)

هنلبسك توبك
مين دا اللى يقدر يكسرك
وانتى ولادك دول
مين دا اللى ما يعرف يقدرك
 وانتى عروسة الكون

مين من ولادك يهجرك
وانتى آلام الحنون
مين دا اللى فكر يقسمك
دا انتى لعدوك أتون
 يا صمام امان الكون

انتى بلدى ام البطل
ابنك الجندى الجسور
اللى يعاديكى هينبتر
ويعود تانى محسور
جيش الصهاينه انكسر
وكمان لويس ومغول
يا ام صلاح الدين
ياارض جبال الطور
ما جالك عدو ف يوم
جيشه رجع منصور
يا ام ناصر وجاهين
ياأم السادات وزويل
لو فاكره ماتو دول
احفادهم وأولادك
عاييشين وبالملايين
لو جعنا فيكى يوم
مش راح نقول مساكين
ونرمى عليك اللوم
واحنا الغلط فينا
قاضينها نوم وعويل
توهنا خطاوينا
خلاص بقى اسفين
عرفنا طريقنا منين
وبدأنا خطاوينا
شفتينا فى التحرير
نادهتى لبينا
خلاص بقى اسفين
بدأنا خطاوينا
هنغزلك بالنول
وهنزرعك بساتين
وعلمك هيملى الكون
هنكون ولاد فراعين
هنلبسك توبك
ونعطرك رياحين
خلاص يا محبوبتي
عرفنا طريقنا منين
وهتبقى ست الكل
صبرك عليا يومين
يا ام شجرة الدر
صبرك عليا يومين
لو عايزا منى دليل
 انا عندى الف دليل

شايف انا فلاحك
فاسه على كتفه
يطلع من الفجريه
يرجع بدايه الليل
شايف انا جندك
روحه على كفه
وهبها ليكى هديه
ويقول دا ليك قليل
و أخوه التانى جانبه
سايب ولاده سليم
وجاى يحميك
رجع بلا رجلين
ما كلنا فداك
أدى دليل ودليل
يا بلدى يا ام النيل
خدى كلامى يقين
صبرك عليا يومين
وهتبقى ست الكل
ونلبسك توبك
 ونعطرك رياحين(وائل عمر)